آصف زرداری جیل میں اے سی کیلئے بے تاب، وکیل نے بھاگ دوڑ شروع کردی

احتساب عدالت اسلام آباد نے سابق صدر آصف زرداری کو فراہم سہولتوں کی تفصیلات چار ستمبر تک طلب کرلی ہیں۔

احتساب عدالت میں سابق صدر آصف علی زرداری کو جیل میں سہولیات نہ دینے پر توہین عدالت کی درخواست پر سماعت ہوئی ۔ درخواست پر سماعت ڈیوٹی جج راجہ جواد عباس حسن نے کی۔ سابق صدر کے وکیل لطیف کھوسہ عدالت کے روبرو پیش ہوئے۔ درخواست پر آصف زرداری کے وکیل لطیف کھوسہ نے دلائل دیئے کہ آصف زرداری کو 1999 میں بھی سہولیات دی گئی تھیں۔ اس وقت سنیٹر تھے اور سہولیات فراہم کی گئیں۔ جج نے استفسار کیا کہ اس وقت بھی سہولیات اپنے خرچہ پر حاصل کی تھیں۔

جس پر وکیل نے کہا کہ نہیں اس وقت سہولیات حکومت کی جانب سے مہیا کی گئی تھیں۔ عدالتی حکم میں اے سی کا واضح نہیں لکھا گیا لیکن اے سی ممنوع بھی نہیں ہے۔ اب سابق صدر ہیں اور عدالت کے حکم پر بھی بیٹر کلاس فراہم نہیں کی جا رہی۔

زرداری صاحب عارضہ قلب میں مبتلا ہیں مسائل بڑھ سکتے ہیں۔ ایک اٹینڈنٹ بھی رکھنا چاہتے ہیں اسے پتہ ہے کہ کون سی دوائی کس وقت کھیلانی ہے۔

لطیف کھوسہ کے دلائل مکمل ہونے پر نیب پراسیکیوٹر عثمان مرزا نے کہا کہ جیل میں اٹنڈنٹ موجود ہیں جو ان کی بہتر دیکھ بھال کر سکتے ہیں۔ اے سی والی سہولت عدالتی حکم میں نہیں ہے۔

جیل حکام نے کہا کہ اے سی کیلئے ہوم سیکرٹری سے رابطے میں ہیں جیسے ہی اجازت ملی گی لگادیا جائے گا۔

عدالت نے جیل حکام سے تفصیلات طلب کر لیں۔ عدالت نے حکم دیا کہ کون کون سی سہولیات فراہم کر دی گئی ہیں مکمل تفصیلی رپورٹ پیش کی جائے۔ ہوم سیکرٹری کو کیا لکھا ہے اس کی تفصیلات بھی دی جائیں ۔ عدالت نے درخواست پر سماعت 4 ستمبر تک ملتوی کر دی۔

from پاکستان
https://ift.tt/2LfqZ9J