جلد بوڑھا کرنے والی نقصان دہ عادات

ہماری زندگی میں غیر صحت مندانہ عادات ایک طرف تو ہمیں بے شمار بیماریوں میں مبتلا کرتی ہیں، دوسری طرف یہ ہماری جلد اور عمر پر بھی منفی اثرات مرتب کرتی ہیں۔

ان غیر صحت مندانہ عادات کی وجہ سے بعض افراد اپنی عمر سے بوڑھے نظر آنے لگتے ہیں۔

اگر آپ بھی کچھ ایسی ہی صورتحال کا شکار ہیں، یعنی اپنی عمر سے بڑے نظر آتے ہیں، تو پھر آپ کو جاننے کی ضرورت ہے کہ آپ میں کون کون سی مضر صحت عادات موجود ہیں۔

---

سن اسکرین کا استعمال نہ کرنا

ماہرین کا متفقہ طور پر ماننا ہے کہ دھوپ کے مضر اثرات سے بچنے کے لیے ضروری ہے کہ روزانہ جلد پر سن اسکرین کا استعمال کیا جائے۔ جلد پر براہ راست دھوپ کی روشنی جلد کے کینسر میں مبتلا کر سکتی ہے۔

---

کروٹ لے کر سونا

اگر آپ کروٹ لے کر سونے کے عادی ہیں تو آپ اپنی جلد کو نقصان پہنچا رہے ہیں۔ کمر کے بل سیدھا سونا بہترین پوزیشن ہے، یہ نہ صرف آپ کو نیند کے دوران آرام فراہم کرتی ہے بلکہ یہ کمر درد سے بھی نجات دلاتی ہے۔

---

کم چکنائی والی غذائیں

ویسے تو ماہرین چکنائی کو جسم کے لیے مضر قرار دیتے ہیں اور یہ موٹاپے، فالج اور امراض قلب سمیت کئی بیماریوں کا سبب بنتی ہیں لیکن ایسا صرف اس صورت میں ہوتا ہے جب آپ حد سے زیادہ چکنائی والی غذائیں کھانے لگتے ہیں۔

دنیا میں موجود کوئی بھی شے نقصان دہ نہیں ہے۔ ایک خاص مقدار کے اندر لی جانے والی چکنائی بھی ہمارے جسم کے لیے فائدہ مند اور ضروری ہے۔

اگر آپ چکنائی کا استعمال بالکل کم کردیں گے تو آپ کی جلد خشک ہونے لگے گی اور اس پر جھریاں نمودار ہونے لگیں گی یوں آپ آہستہ آہستہ بوڑھے محسوس ہوں گے۔

---

چینی کا کم استعمال

چکنائی کی طرح چینی کا زیادہ استعمال بھی صحت کے لیے مضر ہے تاہم اس کا یہ مطلب بھی نہیں کہ آپ اپنی زندگی سے مٹھاس کو بالکل خارج کردیں۔

ہفتے میں ایک سے دو بار بھرپور میٹھا جیسے کوئی سویٹ ڈش یا کیک کو اپنی غذا کا حصہ بنائیں۔ شوگر کی مناسب مقدار دماغی کارکردگی میں اضافہ کرتی ہے۔

---

اسٹرا سے پینا

مشروب اور مائع اشیا کو اسٹرا سے پینے کی عادت آپ کے ہونٹوں کے آس پاس جھریاں پیدا کرنے کا باعث بنے گی۔ اگر آپ ہمیشہ اسٹرا سے مشروبات پینے کے عادی ہیں تو اس عادت کو فوراً ترک کرنے کی کوشش کریں۔ اس کی جگہ براہ راست گلاس سے پیئں۔

یہی نقصان سگریٹ نوشی کا بھی ہے۔ سگریٹ نوشی مختلف بیماریاں اور نقصانات پیدا کرنے کے ساتھ ساتھ جھریاں پیدا کرنے کا سبب بھی بنتی ہے لہٰذا اگر آپ سگریٹ نوشی میں مبتلا ہیں تو آہستہ آہستہ اس عادت سے چھٹکارہ پانے کی کوشش کریں۔

---

نیند کی کمی

روزانہ بھرپور نیند آپ کے جسم اور دماغ کو توانا رکھنے میں مدد دیتی ہے۔ نیند کی کمی جسمانی، ذہنی اور نفسیاتی صحت پر اثر انداز ہوتی ہے اور آپ کو بوڑھا کرنے کے ساتھ ساتھ بدترین نقصانات پہنچاتی ہے۔

یہی نہیں نیند کی کمی آپ میں کئی جان لیوا امراض کا خطرہ بھی بڑھا دیتی ہے جس سے آپ قبل از وقت موت کا شکار بھی ہوسکتے ہیں۔

---

بیٹھنے کی غلط پوزیشن

اگر آپ بیٹھتے ہوئے غلط پوزیشن اختیار کرتے ہیں تو یہ عمل آپ کی ہڈیوں اور اعصاب کو تھکا دے گا جس کے بعد آپ خود کو تھکا تھکا محسوس کریں گے۔

طویل عرصے تک غلط زاویوں سے بیٹھنا ہڈیوں کو بوسیدگی کا شکار کرنے لگتا ہے یوں آپ وقت سے قبل ہی جوڑوں کے درد کا شکار ہوسکتے ہیں۔

---

زیادہ درجہ حرارت

سردیوں کے موسم میں گھر کو بہت زیادہ گرم کردینا، اور تیز گرم پانی سے نہانا آپ کی جلد اور بالوں کو خشک کردیتا ہے۔

اپنے جسم کو ہلکے گرم درجہ حرارت سے گرمی پہنچائیں۔

---

ذہنی تناؤ

پریشانی، ذہنی تناؤ اور دباؤ نہ صرف آپ کے دماغ کو متاثر کرتے ہیں بلکہ آپ کی جلد پر بھی منفی اثرات ڈالتے ہیں جس سے آپ بوڑھے نظر آنے لگتے ہیں۔

---

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

The post جلد بوڑھا کرنے والی نقصان دہ عادات appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar
https://ift.tt/2HG7KGk