سابق کرکٹر شعیب اختر کے بڑے خواب

پی سی بی کا چیف سلیکٹر بننے کی دوڑ میں شعیب اختر بھی شامل ہیں، چیف سلیکٹر بننے کا خواب دیکھنے والے سابق کرکٹر شعیب اختر نے اپنا پلان بھی تیار کر لیا۔

پی سی بی کا چیف سلیکٹر بننے کی دوڑ میں راشد لطیف، شعیب اختر اور محسن حسن خان شامل ہیں، سابق پیسر کا کہنا ہے کہ میری بات ضرور ہوئی ہے، فی الحال اس بارے میں کچھ نہیں کہہ سکتا۔

ایک انٹرویو میں انھوں نے کہا کہ مجھے کوئی سفارشی فون نہیں آئے گا،اگر موقع ملا تو کم ازکم 50 کرکٹرز کا ایک پول تیار کرنے کی کوشش کروں گا، ہرفارمیٹ کیلیے ٹیلنٹ موجود ہونا چاہیے، چند کھلاڑیوں پرباربار انحصار کرنے کے بجائے ملک کے کونے کونے سے ٹیلنٹ تلاش کرنا ہوگا۔

راولپنڈی میں کلب کرکٹ کے دوران گلگت بلتستان کے کئی انتہائی باصلاحیت کرکٹرز ہمارے ساتھ کھیلتے تھے اب وہاں کا ٹیلنٹ کہاں جا رہا ہے، ہمیں وہاں تک جاکر ان کھلاڑیوں کوکھوج نکالنا ہوگا۔

شعیب اختر نے کہا کہ قومی سطح پر ٹیموں کی سلیکشن سے قبل گراس روٹ لیول پر کام کرنا ضروری ہے، انھوں نے کہا کہ ٹیلنٹ کی پرکھ کرنے والی آنکھ ہونی چاہیے،کسی میں صلاحیت مگر چند ایک تکنیکی خامیاں یا مسائل ہیں تو ان کا حل تلاش کیا جانا چاہیے۔

ایک سوال پر ان کا کہنا تھا کہ قیادت سنبھالنے کے بعد سرفراز احمد بڑے مثبت ذہن کیساتھ میدان میں اترتے بعد میں ان کا مائنڈ سیٹ تبدیل ہوا۔

from کھیل https://ift.tt/2OL3wkF
https://ift.tt/eA8V8J