نگران وزیراعظم کی زیر صدارت الیکشن انتظامات سے متعلق اہم اجلاس آج ہوگا

نگران وزیراعظم ناصر الملک کی زیر صدارت الیکشن انتظامات سے متعلق اہم اجلاس آج ہوگا۔

صبح ساڑھے گیارہ بجے وزیراعظم ہاؤس میں ہونے والے اجلاس میں چاروں نگران وزرائے اعلیٰ، چیف سیکریٹریز اور انسپکٹر جنرلز (آئی جیز) آف پولیس شرکت کریں گے۔ ذرائع کے مطابق چیف الیکشن کمشنر جسٹس (ر) سردار رضا اجلاس کے شرکاء کو انتخابی انتظامات سے متعلق بریفنگ دیں گے۔

اجلاس کے دوران چاروں آئی جیز الیکشن کے حوالے سے سیکیورٹی پلان پر بریفنگ دیں گے۔ واضح رہے کہ عام انتخابات 2018 آئندہ ماہ 25 جولائی کو ہونے جا رہے ہیں۔

الیکشن 2018 کے لیے سیکیورٹی انتظامات

الیکشن کمیشن نے انتخابات میں حصہ لینے والے تمام امیدواروں کو سیکیورٹی فراہم کرنے کا حکم دیا ہے اور اس حوالے سے صوبائی حکومتوں کو مراسلہ بھیجا جاچکا ہے۔ مراسلے میں کہا گیا ہے کہ چاروں حکومتیں، امیدواروں کوسیکیورٹی فراہم کریں اور سیاسی جماعتوں کے قائدین کو بھی سیکیورٹی فراہم کی جائے۔

الیکشن کمیشن نے صوبائی حکومتوں کو ملک کے انتہائی حساس پولنگ اسٹیشنوں پر جلد سی سی ٹی وی کیمرے نصب کرنے کا بھی حکم دیا ہے۔ دوسری جانب وزارت دفاع نے الیکشن کمیشن کی درخواست پر عام انتخابات کے لیے پاک فوج کے ساڑھے 3 لاکھ اہلکار دینے کی بھی حامی بھرلی ہے۔

واضح رہےکہ الیکشن کمیشن نے عام انتخابات میں پاک فوج تعینات کرنے کا فیصلہ کیا ہے جس کے تحت بیلٹ پیپرز کی چھپائی اور ترسیل بھی فوج کی نگرانی میں کی جائے گی اور پاک فوج کے اہلکار 27 جون کو پرنٹنگ پریس کی سیکیورٹی سنبھال لیں گے۔ عام انتخابات کے لیے پولنگ سے 4 روز قبل فوج کو بلایا گیا ہے، پاک فوج کے اہلکار پولنگ اسٹیشن کے اندر اور باہر تعینات ہوں گے جب کہ انتہائی حساس پولنگ اسٹیشنوں پر اہلکاروں کی اضافی نفری تعینات کی جائے گی۔

from پاکستان
https://ift.tt/2yEh0Xb