کراچی پہنچنے پر رانا مشہود اور سلیم ضیاء سمیت دیگر نے شہبازشریف کو خوش آمدید کہا اور پارٹی کارکنان نے اپنے صدر کا پرجوش استقبال کیا، سابق وزیراعلیٰ پنجاب اور مسلم لیگ (ن) کے صدر شہبازشریف کراچی میں دو روز قیام کریں گے۔
شہبازشریف اپنے دورے میں فیڈریشن آف پاکستان چیمبرز آف کامرس اینڈ انڈسٹریز (ایف پی سی سی آئی) کی دعوت پر تاجروں اور صنعت کاروں سے خطاب کریں گے۔
(ن) لیگ کے صدر آج شام اپنے حلقے این اے 249 کا دورہ کریں گے اور بلدیہ ٹاؤن میں عوامی جلسے سے خطاب کریں گے، اس کے علاوہ وہ منگل کو لیاری اور ضلع ملیر کا بھی دورہ کریں گے۔
کراچی آمد سے قبل اپنے ایک بیان میں شہبازشریف کا کہنا تھا کہ انتخابی مہم قائد اعظم کے شہر سے شروع کررہا ہوں، ہمیشہ سے کراچی آنا عزت اور خوشی کا باعث رہا ہے، یہ شہر ہر کمیونٹی اور صوبے کے لوگوں کی نمائندگی کرتا ہے۔
سابق وزیراعلیٰ پنجاب نے کہا کہ کراچی کے عوام کا جوش و جذبہ ہمیشہ سے مجھے متاثر کرتاہے، چاہتا ہوں میں اس شہر کی آواز سنوں اور س کی آواز بنوں۔
ان کا کہنا تھا کہ کراچی کو اکیسویں صدی کا ترقی یافتہ شہربنائیں گے۔
اپنے ویڈیو پیغام میں شہباز شریف کا کہنا تھا کہ 2013 میں بجلی کا بحران ختم کرنے کا وعدہ کیا تھا اور آج پاکستان میں بجلی کی لوڈشیدنگ تقریباً ختم ہو چکی ہے۔
شہباز شریف نے کہا کہ مسلم لیگ (ن) کے دور میں کراچی کا امن واپس آ چکا ہے۔
انہوں نے مزید کہا کہ پاکستان کو اسلامی، فلاحی مملکت بنانے کا خواب پورا ہونے تک چین سے نہیں بیٹھیں گے۔
دوسری جانب گزشتہ روز قائد مسلم لیگ (ن) اور سابق وزیراعظم نواز شریف نے لندن میں صحافیوں سے گفتگو میں کہا تھا کہ بیگم کلثوم نواز کی بیماری کی وجہ سے فی الحال ان کے لیے الیکشن مہم میں حصہ لینا ممکن نہیں۔
واضح رہے کہ کینسر کے عارضے میں مبتلا بیگم کلثوم نواز گزشتہ کئی ماہ سے علاج کی غرض سے لندن میں موجود ہیں جہاں ان کی کئی کیمو تھراپیز ہو چکی ہیں۔
رواں ماہ 15 جون کو کلثوم نواز کی طبیعت خراب ہونے کے بعد انہیں ایک بار پھر اسپتال منتقل کیا گیا تھا، جہاں وہ اب تک وینٹی لیٹر پر ہیں۔
from پاکستان
https://ift.tt/2K6gFC7
0 Comments