چند ہفتوں میں سیاست میں ہمہ گیر تبدیلیاں آسکتی ہیں: شیخ رشید کی نئی پیشگوئی

World News منگل, جنوری 17, 2023

عوامی مسلم لیگ کے سربراہ اور سابق وفاقی وزیر شیخ رشید احمد کا کہنا ہے کہ ملک معاشی طور پر دیوالیہ پر پہنچ چکا ہے، حکمرانوں کواپنی عیاشیوں سے فرصت نہیں ہے، چند ہفتوں میں سیاست میں ہمہ گیر تبدیلیاں آسکتی ہیں۔

سماجی رابطے کی ویب سائٹ ٹوئٹر پر جاری بیان میں شیخ رشید نے کہا ہے کہ 13 سیاسی جماعتوں کا بھان متی کاکنبہ اپنی سیاسی موت مررہا ہے اور یہ پاکستان کو بھی اپنی لپیٹ میں لے رہا ہے، غریب کی فاقہ کشی حکمرانوں کی موج مستی ملک میں تصادم کرائے گی۔

سربراہ عوامی مسلم لیگ کا کہنا ہے کہ میں چار دنوں کے لئے UK آیا ہوں۔ لندن اور مانچسٹر میں پاکستانیوں سے ملاقات کروں گا۔ یہاں سارے پاکستانیوں کو سپریم کورٹ سے توقع ہے کہ جلد اورسیز کو ووٹ کا حق ملے گا۔ جو کہتے تھے عمران خان کو سیاست نہیں آتی انکو عقل آجانی چاہیے، شہباز شریف پرعدم اعتماد بھی آسکتی ہے، اپریل تک الیکشن شیڈول بھی آسکتا ہے۔