سعودی حکومت کا بین الاقوامی مسافروں کے حوالے سے اہم اعلان

ریاض : سعودی حکومت نے کورونا وائرس کی موجودہ صورتحال کے پیش نظر غیرملکی مسافروں کے ملک میں داخل ہونے سے متعلق اہم فیصلہ کرتے ہوئے پابندی کی مدت میں مزید اضافہ کردیا۔

  سعودی عرب نے بین الاقوامی مسافروں کے مملکت میں داخلے کی پابندی کی مدت میں مزید ایک ہفتے کی توسیع کر دی ہے۔

وزارت داخلہ کی جانب سے جاری کیے گئے بیان میں کہا گیا ہے کہ پابندی میں توسیع کا فیصلہ دنیا کے کئی ملکوں میں وائرس کی تبدیل شدہ شکل سامنے آنے کے بعد احتیاطی تدابیر کے تحت کیا گیا ہے۔

ترجمان وزارت داخلہ کے جاری بیان میں کہا گیا ہے کہ بعض غیر معمولی کیسز میں استثنیٰ بھی ہوگا جبکہ غیر ملکی شہریوں کو سعودی عرب سے واپس جانے کی بھی اجازت ہوگی۔

وزارت داخلہ کے مطابق کورونا وائرس کی عالمی موجودہ صورتحال کا جائزہ لیا جا رہا ہے اور اگر ضروری ہوا تو سفری پابندیوں کی مدت میں مزید توسیع بھی کی جاسکتی ہے۔

یاد رہے کہ کورونا وائرس کی نئی لہر اور تبدیل شدہ شکل کے کیسز رواں ماہ کے آغاز پر برطانیہ میں سامنے آئے تھے اور مشرق وسطیٰ سمیت دنیا کے کئی ملکوں تک پہنچ چکے ہیں۔

 اتوار کو اردن میں برطانیہ سے آنے والے ایک مسافر اور ان کی اہلیہ میں وائرس کی تبدیل شدہ شکل کی تصدیق کی گئی۔

اس سے قبل لبنان نے کہا تھا کہ جمعے کو لندن سے آنے والی ایک پرواز کے مسافر میں وائرس کی تصدیق ہوئی۔ دنیا کے50 سے زائد ممالک نے تبدیل شدہ کورونا وائرس کے کیسز سامنے آنے کے بعد برطانیہ سے آنے والے مسافروں پر پابندیاں عائد کی ہیں۔

from تازہ ترین بین الاقوامی خبریں | دنیا کی خبریں https://ift.tt/3nYgzfq
سعودی حکومت کا بین الاقوامی مسافروں کے حوالے سے اہم اعلان https://ift.tt/3hlXwt4