عالمی ادارہ صحت نے نئی دلی کو دنیا کا آلودہ ترین شہر قرار دے دیا

عالمی ادارہ صحت نے بھارتی دارالحکومت نئی دلی کو دنیا کا آلودہ ترین شہر قرار دے دیا۔

عالمی ادارہ صحت کی جانب سے فضائی آلودگی سے متعلق رپورٹ جاری کی گئی ہے جو دنیا کے ایسے بڑے شہروں کی فضاء کے معیار کو جانچ کر تیار کی گئی ہے جہاں تقریباً 14 ملین یا اس سے زائد کی آبادی موجود ہے۔

بھارتی نیوز سائٹ ہندوستان ٹائمز کے مطابق اس رپورٹ میں دنیا کے سب سے زیادہ 20 آلودہ شہروں میں سے 14 بھارتی شہر شامل ہیں جن میں نئی دلی سمیت ممبئی، پٹنا، آگرہ، واراناسی، جےپور اور جودھ پور بھی شامل ہیں۔

عالمی ادارہ صحت کی رپورٹ کے مطابق آلودہ ترین شہروں میں سرفہرست نئی دلی، دوسرے نمبر پر مصر کا شہر قاہرہ، تیسرے نمبر پر بنگلا دیش کا دارالحکومت ڈھاکا، چوتھے نمبر پر بھی بھارت کا شہر ممبئی جب کہ پانچویں نمبر پر چین کا داراحکومت بیجنگ شامل ہے۔

ہر 10 میں سے 9 افراد آلودہ فضا میں سانس لینے پر مجبور: رپورٹ

رپورٹ کے مطابق دنیا میں 90 فیصد انسان آلودہ فضاء میں سانس لینے میں مجبور ہیں۔

عالمی ادارہ صحت کا کہنا ہے کہ آلودہ فضاء سانس لینے میں دشواری پیدا کرتی ہے جس سے پھیپھڑوں کا مرض، حرکت قلب متاثر ہونا اور دیگر مہلک بیماریوں کا خدشہ لاحق ہوجاتا ہے جو جان لیوا ثابت ہوتا ہے۔

فضائی آلودگی سے سالانہ 7 ملین افراد کی اموات: رپورٹ

عالمی ادارہ صحت کے مطابق فضائی آلودگی سے سالانہ 7 ملین افراد اپنی زندگی سے ہاتھ دھو بیٹھتے ہیں۔

رپورٹ میں بتایا گیا ہےکہ فضائی آلودگی کی اہم وجہ صنعتوں، گاڑیوں اور ٹرک کا دھواں ہے جس سے 4.2 ملین افراد کی سالانہ اموات ہوتی ہے جب کہ جنگلات کی کٹائی اور عمارتوں کی تعمیر میں اضافہ 3.8 ملین افراد کی سالانہ اموات کا باعث ہے۔

from دنیا https://ift.tt/2jqWO0q
عالمی ادارہ صحت نے نئی دلی کو دنیا کا آلودہ ترین شہر قرار دے دیا https://ift.tt/2w25ByY